شرح الطريقة الصحيحة لكتابة المقالات

اهلا بيكم مرة تاني هنا هوضحلكم ازاي تكتب مقال بطريقة صحيحة مرتبة وهيكون اية المطلوب منكم تعملوة بالظبط .

طبعا مهم جدا ان المقال يكون حصري unique article

حصري يعني جديد مش منسوخ من اي مكان تاني ودة شئ مهم جدا جدا جدا 

بداية الناس اللي هتكمل معانا هديك "كلمات مفتاحية" هتشتغل عليها مثلا هقولك اكتب موضوع عن romantic vacations هتبقي هي دي الكلمة المفتاحية للموضوع ومعها هديك كلمات فرعية تحطها كمان في الموضوع بتاعك ودة الموضوع المطلوب منكم كاختبار طيب اية المطلوب توافرة في المقال ؟

 هنوضح النقاط الهامة وبعدها ونعمل تطبيق عملي 

1- الكلمة المفتاحية يجب ان تتواجد في عنوان الموضوع 

مهم جدا ان الكلمة المفتاحية الرئيسية تكون موجودة في عنوان الموضوع بطريقة شيقة طبعا العنوان كل ما كان معمول بشكل شيق كدة يشد الزائر ان يشوف المقال دة بيتكلم عن اية العنوان اختياره بعناية عامل مهم جدا .

2- الموضوع لازم يكون متقسم paragraphs وكل paragraph له عنوان فرعي 

المقال هيبقي 1800 كلمة ( كمية كبيرة ) فلازم شكلة يكون مريح للعين ومنسق فلازم يبقي عبارة عن قطع صغيرة كلها متعلقة ببعضها وفيها تسلسل للافكار .

الكلمة المفتاحية يجب ان تتواجد مرتين علي الاقل في العناووين الفرعية للبراجراف (( مهم جدا ))

3- الكلمة المفتاحية يجب ان تتواجد في اول paragraph في سياق الكلام

4- يجب ان توضع الكلمة المفتاحية في سياق الكلام عشان متبقاش حشو كلمات

 5- الفقرة الاولي :

حاول في الفقرة الاولي انك تلخص الموضوع وتفهم القارئي انت هتكلمة عن اية في الموضوع دة يعني تلخصلة الموضوع في الفقرة الاولي وتشوقة انه يكمل قرائة >>> ودي حتة ابداعية تتوقف علي ابداع كل واحد فيكم . اول فقرة هي اللي هتحكم علي نجاح مقالك او فشلة لان الزائر بيقرا اول براجراف لو عجبة بيكمل معجبوش بيقفل الصفحة

6- نقاط واضحة في الموضوع وعناويين فرعية :

>>>>>>> مثال توضيحي  لمقال الكلمة المفتاحية له هي "مقال حصري " :

دة الشكل الصحيح لمقال ممتاز في تنسيقة وترتيبةلاحظ الكلمة المفتاحية مظلله بالاصفر :

*************************************************

************************************************

طريقة كتابة المقالات:

لازم تفهم الموضوع كويس وتحاول تحدد انت هتقول اية للقارئي وعشان تعرف توصل لعقلية الزائر اللي هيشوف المقال بتاعك لازم تفهم هو عايز اية بالظبط مثلا لما هنتكلم عن romantic vacations 

ياتري مين اللي ممكن يبحث عن الكلمة دي ؟

احنا مش بنوجة مقالاتنا للعرب احنا بنوجة مقالاتنا للاجانب ... 

يبقي اتنين شباب بيحبوا بعض وعايزين يقضوا اجازة رومانسية مع بعض .

ممكن اتنين متجوزين جديد وعايزين مكان رومانسي يقضوا فية وقت لطيف .

ياتري الباحث عن الكلمة دي محتاج اية ؟

- محتاج يعرف افكار جديدة لقضاء اجازة رومانسية 

- محتاج يعرف افضل الاماكن لقضاء اجازة رومانسية

- محتاج يعرف اجمل الفنادق اللي بتوفر جو رومانسي وهادي

- محتاج يعرف افضل العروض للكابيلز 

- محتاج حد يشجعة علي افكار شيقة وجديدة 

- زينا كمصررين وعرب في ناس منهم بتدور علي اماكن رخيصى وغير مكلفة

فهمت دلوقت انا هكتب لمين هو مهتم باية ابداء ابحث عن النت عن مقالات تتكلم عن romantic 

 vacations

* ابحث في جوجل عن افكار

ممكن تبحث في جوجل وتفتح 4 مقالات وتفهم الافكار اللي فيهم وترجع تعبر عنهم في مقالك "باسلوبك" الخاص متنقلش حاجة افهم الافكار والموضوعات بس واعمل مسودة كدة قسم المقال بتاعك فقرات واكتب كل فقرة باسلوبك .... حاول الاسلوب يكون حلو ولذيذ ميكونش ركيك كدة عامل زي موضوعات التعبير اللي علمونا نعملها ف المدرسة ... حط ف دماغك انك بتتعامل مع حد لغتة الام هي الانجليزية مش مع الاستاذ اللي بيصححلك الامتحان :)

استعين بالموضوعات الاكثر مشاركة علي الشبكات الاجتماعية

ممكن تبحث في الموقع دة : Buzzsumo سجل فية حساب تجريبي free trial لمدة شهر وابحث عن الكلمة المفتاحية هيجيبلك اكتر المقالات اللي تمت مشاركتها ف الشبكات الاجتماعية ... طبعا دة دليل علي انها مقالات عجبت كل الناس اللي شافتها فبالتالي شاركتها علي الشبكات الاجتماعية دي 

لمن لا يعرف موقع Buzzsumo فهو موقع مختص بمعرفة أكثر قطع المحتوى مشاركة على الإنترنت فى شتى المجالات وفى مختلف التوقيتات .

أهمية هذا الأمر أنه يعطيك فكرة عن أهم أفكار المحتوى التى يبحث عنها الناس بشدة ويشاركونها على الإنترنت بكثرة .

طريقة تاني: من عربي لانجليزي

رتب افكارك وقسمها فقرات وابداء ابحث عن الافكار دي باللغة العربية وكون مقال مميز كدة وارجع ترجمة بالانجلش باسلوبك .

ارجو من كل واحد فيكم مهتم انه ىنضم لينا يكتب مقال حصري 1800 كلمة عن romantic vacation
علي ملف word ويبعته علي الانبوكس بتاع البيدج دي من هناااااااااااااااا

توضيحات هامة عن اعلان العمل ككاتب في موقع اليكتروني

اهلا وسهلا بحضراتكم 

انا حبيت اجمع كل الاسئله هنا عشان اي حد يحب ينضم لفريق العمل معانا تبقي كل الامور واضحه معاه ارجو ان الموضوع يجاوب علي كل الاسئلة المطروحة عن الموضوع 

ما مدي اهمية جودة المقالات في الموقع ؟

 الموقع بيتكلم عن السياحة والسفر عامة. يعني في كل بلاد العالم وبيقدم افكار مرتبة ومنسقة للناس اللي بتهوي السفر حول العالم وطبعا الموقع باللغة الانجليزية فانت هتتعامل مع اجانب بيعشقوا السفر حول العالم عايزين يقروا معلومة جديدة مفيدة عن السفر .
الناس اللي بتدخل تقرا المقال اللي انت هتكتبه مش هنجيبهم من فيس بوك ولا تويتر ..... الخ لا احنا هنجيبهم من محركات البحث ( Google , Bing , Yahoo .... extr )  بمعني ان اللي داخل يقرا المقال دة حد مهتم بالموضوع وبيبحث عن معلومة معينة هيبتدي يقرا المقال اللي انت كاتبه من الشكل العام للمقال ومن اول سطرين هيحكم علي المقال لو مقالك "مفيد" ومكتوب "بطريقة منسقة" هيكمل قرايه المقال للاخر وممكن يعمله share ع الفيس بوك او تويتر او اي شبكة اجتماعية وبالتالي اصدقائه هيدخلوا يقروا المقال كمان وبكدة الموقع هياخد value كبيرة .
لكن لو حصل العكس دخل الزائر حس ان المقال عبارة عن "بلح لبن تمر هندي" يعني شوية كلام مرصوصين ورا بعض ملهمش اي معني ومفيهمش اي معلومة هيعمل Back علي طول ويرجع يدور عن موقع تاني .
يبقي نجاح الموقع من عدمة يتوقف علي جودة المقالات اللي بتقدمها ومدي الفايدة منها وطريقة كتابتها بالطريقة الصحيحة . طريقة واسلوب الكتابة انا هعلمهملك ببساطة شديدة اما الفايدة اللي هتقدمها (المعلومات) دي انت هتبحث عنها وترتبها في المقال باسلوبك .

ماذا سيحدث ان قمت بنسخ الموضوع او خياطته ؟

طبعا نسخ الموضوع دي معروفة هتاخده كوبي بيست من مكان تاني اول حاجة المقالات المنسوخة دي بتقلل من قيمة الموقع لدرجة متتخيلهاش جوجل مستحيل يطلع الموقع دة ف الصفحة الاولي في نتائج البحث . اما خياطة الموضوع دي معناها انك تاخد جمله من هنا علي قطعة من هنا علي حته من هناك يطلعوا معاك مقال دة مرفوض تماما بس ممكن يتعمل بطريقة معينة انا هشرحهالك ف الاخر .
انا بفحص المقالات يدويا وكمان بادوات متخصصة في تحديد هل المقال حصري ام منسوخ زي الاداة بتاعة موقع http://www.copyscape.com . في حالة التاكد من ان مقالك منقول يتم انهاء العمل نهائيا .

مؤهلات المقبولين في العمل :

انا مش عايز حد واخد ماجيستر او دكتوراه او كلية معينة انا عايز حاجتين بس انك تكون "ممتاز في الانجلش"
كتابة + قواعد تقدر تكتب مقال انجليزي بدون اخطاء لغوية او في القواعد . وتقدر تترجم مقال من عربي لانجليزي بدون اخطاء .
الحاجة التانية يكون عندك وقت فاضي ساعتين ع الاقل يوميا .
انا مش عايزك تقدملي شهادات ولا اي اثبات عايز اشوف الكلام دة عملي في شغلك لو انت شايف ان دة متوفر فيك متترددش تكون معانا .

ما هي طبيعة العمل تحديداً ؟

الشغل دة هيكون كله اونلاين يعني هتكتب المقال انت وف البيت في الوقت اللي تحبه بس اهم شئ تلتزم انك تسلمني الكم اليومي اللي هنتفق علية .
المقال الواحد لا يقل عن (( 1800 )) كلمة ودة شئ مهم للغاية اكررها مرة تاني المقال الواحد ميقلش عن 1800 كلمة مش عايز اي صور في المقال كتابة وبس .
هتختار بين حاجة من الاتنين :
1- انك تكون مترجم يعني تستلم مني المقالات باللغة العربية تترجمها وتسلمها لي مرة تاني او
2- انك تكتب المقال من الصفر يعني تاخد عنوان الموضوع وتجمع معلومات عنه من النت وترجع تعبر عنهم باسلوبك بطريقة منظمة منسقة .

كم الراتب المتوقع من الشغلانه دي :) ؟

انا عارف ان امكانيات كل واحد فينا مختلفة عن التاني والموضوع فية حتة ابداع شوية في ترتيب المعلومات وكتابتها باسلوب شيق بس انا مبدئيا هوحد الاسعار عشان كله يبقي زي بعضه بس وعد مني انه بعد اول شهرين اللي هيكمل معايا للاخر هيكون له مرتب مجزي وثابت ان شاء الله ودة وعد مني
لو انت هتختار انك تكون مترجم يعني هتستلم المقالات مني عربي تترجمها وتسلمهالي مرة تاني هتاخد عن المقال 8 جنية مصري .
في حالة انك هتكتب الموضوع من الصفر هتاخد 10 جنية مصري عن المقال .
بالنسبة للكمية هتبقي علي حسب العدد اللي هيتقدم او الناس اللي هتتقبل معانا .

كيف استلم الراتب ؟

هتكون طريقة الدفع "فودافون كاش" او "حوالة بالبريد المصري" او "شحن الرصيد" او اي طريقة اليكترونية تحبوها والدفع هيكون اسبوعيا عشان الناس متعرفنيش وعشان يكون في مصداقية ما بينا .

هو انت مين ياعم انت ؟

انا مش شركة او مؤسسة زي ما ناس كتير منكم فاكرة انا شاب عادي عندي طموح ان الموقع دة يكون من اكبر المواقع في مجال السياحة باذن الله . انا بشتغل مهندس مدني لكن مهتم جدا بانشاء المواقع والترويج ليها والحمد لله الموضوع مش مجرد هواية انا عارف كويس انا بعمل اية :)
الموقع دة انا بعتبرة مشروعي الشخصي وبحلم انه بعد ما يحقق نجاح اعمل علي اسمه شركة سياحة كبيرة ان شاء الله .
طرق التواصل :
انا بفضل ان التواصل يكون عن طريق فيس بوك لاني بكون متواجد اونلاين كتير او ممكن ياهو ماسنجر او سكايب . طبعا قبل اي حاجة بحترم خصوصية الشخص اللي هيكون معايا في فريق العمل . واتمني انه يكون في تواصل هاتفي ما بيني وبين فريق العمل بس دا يرجع لغبرة كل واحد فيكم .
طريقة التقدم والقبول للعمل :
دلوقتي بعد ما عرفت تقريبا كل حاجة عن الشغل دة لو مهتم انك تكون معايا في فريق العمل . مطلوب منك انك تعملي مقال حصري 1800 كلمة عن " Romantic vacations "
قبل ما تعمل المقال لازم تتطلع علي الموضوع التالي : (( كيف تكتب المقال بطريقة صحيحة ))

لو ليك اي سؤال بخصوص العمل ارجو ان تتركة في تعليق وانا هجاوب عليه مباشرة

ارجو للمهتمين سرعة المراسلة لاني مستعجل في تكوين فريق العمل والبدء .

للمراسلة ابعت رسالة علي بريد الصفحة دي من هــــــــــنا

>>>>> هحتاج حد مصمم جرافيكس شاطر ف الفوتوشوب
>>>>> هحتاج حد صانع فيدوهات
لو تعرف حد مناسب ياريت تشير ةله الموضوع :)